Ungbarnasamfella úr Kambgarni

Fyrir nokkrum árum prjónaði ég þessa fínu samfellu á eldri dóttur mína sem þá var tæplega ársgömul. Ég setti uppskriftina saman úr mismunandi hugmyndum sem ýmist áttu sér uppsprettu í kollinum á mér eða prjónablöðum.

Ég notaði Kambgarn í hana sem voru ábyggilega verstu mistökin því hún eyðilagðist í þvotti rétt eftir að ég kláraði hana. Ég man ekki lengur hvort það var mér eða manninum mínum að kenna en notum hann sem sökudólg ;)

Ekki misskilja samt, ég elska Kambgarn og nota aftur og aftur. Ég veit bara að næst þarf að passa extra vel að þvo varlega í höndunum.

En með samfelluna þá er ég oft spurð hvort ég eigi uppskriftina eða sé til í að skrifa hana upp. Hingað til hef ég eitthvað verið að draga lappirnar með það. Örugglega mest vegna þess hversu fúl ég var þegar samfellan eyðilagðist. En ég ákvað svo skyndilega að demba mér bara í það. Ég er ekkert að ráðast á garðinn þar sem hann er lægstur því þar sem frumeintakið eyðilagðist þá er ég mikið til að gera þetta eftir minni og frekar óljósum teikningum. Ég er núna langt komin með að prjóna "prótótýpu" í einni stærð og bíð spennt eftir að sjá hvernig til tekst.

Ef allt gengur upp eins og ég ætla mér þá verða 3 stærðir í boði, þ.e. 3-6 mánaða, 6-9 mánaða og 9-12 mánaða. Mér finnst það akkúrat vera aldurinn þar sem maður er til í að eiga hlýja samfellu fyrir vagninn. Allavega var það upphaflega tilgangurinn með að prjóna svona á dóttur mína.

Tilgangurinn með þessum pósti er s.s. að hvetja mig í að klára og ég vonast til að geta deilt uppskriftinni á Ravelry í þessum mánuði :)

  

Ný uppskrift - ungbarnahúfa með áttblaðarós

Ég prjónaði þessa húfu fyrst þegar eldri dóttir mín var ungabarn árið 2010. Var búin að gera samfellu sem ég var voða ánægð með og ákvað að skálda húfu í stíl. Svo pældi ég bara ekkert meira í því og var agalega ánægð með settið. Nema svo tókst mér auðvitað að eyðileggja samfelluna í þvotti þannig að hún var því miður ekki mikið notuð. En húfuna notaði ég helling.

Núna nýlega tók ég svo upp húfuna til að nota fyrir yngri dóttur mína og mundi þá hvað ég var ægilega ánægð með hana. Ég ákvað því að skrifa niður uppskriftina og er hún nú til sölu á Ravelry og HÉR. Reyndar er bara ein stærð í boði, 4-6 mánaða, en það er hægt að stækka eða minnka með því að nota fínna eða grófara garn. Ég notaði Kambgarn í mína húfu. 

Svo mæli ég með snilldar dúska-græjunum frá Clover til að gera dúskinn. Ég keypti mínar í Storkinum og þarf eiginlega að eignast fleiri stærðir, er svo dúskasjúk. Mun aldrei aftur nenna að gera þá með pappaspjaldi.

Bylgjuteppi úr Kambgarni

Teppaæðið mitt heldur áfram og í gær kláraði ég bylgjuteppi handa litlu dóttur minni.

Teppið er heklað úr tvöföldu Kambgarni og mér finnst það koma ótrúlega vel út, þ.e. að hafa garnið tvöfalt. Ég hugsa að það verði svipað þykkt og léttlopi eða jafnvel örlítið þykkara. Teppið mitt samt þæfðist pínkupons í þvotti og það er kannski þess vegna sem mér finnst það þykkara en ella.

En ég elska litina í Kambgarninu, sérstaklega þessa gráu og bleiku, og langar eiginlega að gera fleiri teppi með allskonar litasamsetningum.

Uppskriftin er svona frekar beisik og hana má finna ókeypis hér á þessu bloggi.

Ég held að í teppið hafi farið tæplega ein dokka af hverjum gráum og bleikum lit en 7 eða 8 af hvítum. Endanleg stærð eftir þvott (og mögulega örlitla þæfingu) er ca. 65x95 cm.

Ég er rosa ánægð með útkomuna og hlakka til að byrja að nota teppið fyrir dömuna. Ég veit allavega að það er mjög hlýtt og gott því mér var mjög heitt af því að hafa það í kjöltunni á meðan ég heklaði.

Nýr fjölskyldumeðlimur

Ég hef ekki mikið prjónað eða heklað undanfarna daga enda upptekin við að sinna nýjasta fjölskyldumeðlimnum sem kom í heiminn síðastliðið mánudagskvöld. Litla daman lét sjá sig um tíuleytið eftir dagslanga dvöl á fæðingardeildinni. Hún er auðvitað fullkomin og öllum heilsast vel.

Ég hef aldrei farið í gegnum gangsetningu áður og verð að segja að ég hafði það ansi huggulegt yfir daginn og nýtti tímann m.a. til að hekla. Er að gera enn eitt teppið úr tvöföldu Kambgarni eftir þessari uppskrift.

Ég var síðan orðin ansi spennt að sjá hvernig heimferðarsettið myndi passa á dömuna en ég tók smá áhættu með peysuna og minnkaði minnstu stærðina um ca. 20%. Það kom svo í ljós að hún passaði fínt nema ég hefði kannski mátt hafa hettuna oggulítið lengri. Húfan og sokkarnir voru pörfekt.

Nú taka við "rólegheita" dagar heima og það fer að koma að því að maður tekur upp prjónana/nálina á milli gjafa ;)

Teppi, teppi og fleiri teppi.

Ég er búin að vera með teppi á heilanum núna í margar vikur ... hef ekki klárað nema eitt, frekar lítið dúlluteppi en byrjað á nokkrum og hugsað um all mörg. Væntanlega er það ófædd dóttir mín sem er kveikjan að þessu æði en ég gerði aldrei nein teppi handa eldri börnunum mínum og þetta er víst síðasti sénsinn.

Teppið sem ég kláraði fyrr í sumar er eftir uppskriftinni Flowers in the snow og má finna uppskriftina á þessu bloggi. Það er frekar lítið enda ætlað sem bílstólateppi. Ég held að þetta sé með flottari dúlluteppauppskriftum sem ég veit um og frekar gaman og fljótlegt að hekla.

Ég notaði bómullargarn frá King Cole sem fæst í Rúmfatalagernum. Verð að segja að ég er mjög ánægð með það því litirnir eru ofboðslega fallegir og garnið mjúkt og kósí.

Núna er ég svo með annað teppi á nálinni. Það er eftir uppskriftinni Vintage crocheted blanket nema ég geri það svolítið mikið minna. Er að vona að það endi ca. 60x80 cm eða aðeins stærra. Veit ekki hversu mikið svona hekl stækkar við þvott.

Ég ætlaði fyrst að gera svona hefðbundið bylgju/zigzag teppi en svo fannst mér þetta bæði flottara og ekki eins einhæft að hekla. Er eiginlega bara þrælánægð með hvernig það er að koma út.

Garnið sem ég nota er blanda af Dale Falk og Trysil Superwash. Hið síðarnefnda (hvítur og dekkri bleikur) átti ég á lager en Dale Falk er á útsölu í A4 (á ca. 450 kr.) um þessar mundir og ég nýtti mér það til að kaupa nokkra fallega liti.

Síðan er ég byrjuð á og meira en hálfnuð með ugluteppi, sófateppi úr lopa og dúlluteppi. Fékk bara leið á þeim öllum (sérstaklega ugluteppinu) og liggur í raun ekkert á að klára :P

Bestu ungbarnasokkarnir - uppskrift

Sólin er loksins komin að gleðja íbúa höfuðborgarsvæðisins og nýti ég mér það til hins ítrasta. Á meðan ég sit úti á svölum dunda ég mér við að prjóna ýmislegt smálegt á ófædda krílið eins og sokka. Bestu sokkar sem ég get hugsað mér á ungabörn eru svokallaðir spíralsokkar. Þeir eru ekki með neinum hæl og vaxa þar af leiðandi eiginlega með barninu. Að auki finnst mér þeir haldast mjög vel á.

Ég læt hér fylgja með uppskrift af spíralsokkum á nýfædd kríli. Þeir eru frekar litlir en hægt er að stækka þá annað hvort með því að bæta við 4 lykkjum (eða 8, 12, 16 o.s.frv.) eða með því að nota stærri prjóna og grófara garn. Svo má auðvitað prjóna þá eins langa og hver vill.

Í sokkana þarf:

Baby garn (eða eitthvað fingering weight garn) og prjóna nr. 2,5. Prjónfesta skiptir eiginlega ekki máli.

Fitjið upp 28 lykkjur og tengið í hring.

Umferðir 1-6: 2 l slétt og 2 l brugðið út umferð.

Umferðir 7-10: 1 l brugðið, *2 l slétt og 2 l brugðið*, *-*endurtekið út umferð, 1 l brugðið.

Umferðir 11-14: 2 l brugðið og 2 l slétt út umferð.

Umferðir 15-18: 1 l slétt, *2 l brugðið og 2 l slétt*, *-*endurtekið út umferð, 1 l slétt.

Umferðir 19-22: 2 l slétt og 2 l brugðið út umferð.

Umferðir 7-22 eru síðan endurteknar þar til sokkurinn mælist ca. 10 cm (eða eins langur og hver vill). Best er að enda eftir umf. 12 (en það skiptir ekki öllu máli samt).

Þá er prjónað þannig:

Takið út með því að prjóna brugnu lykkjurnar brugðið saman út umferð.

Prjónið sléttar lykkjur sléttar og brugnar lykkjur brugnar út umferð.

Takið út með því að prjóna sléttu lykkjurnar slétt saman út umferð.

Prjónið sléttar lykkjur sléttar og brugnar lykkjur brugnar út umferð.

Prjónið tvær lykkjur saman út umferð.

Dragið bandið í gegnum eftirstandandi lykkjur og gangið frá endum.

Njótið :)