Uppskrift af álfahúfunni minni

Ég setti uppskriftina af álfahúfunni minni á blað í gær, bæði á íslensku og ensku.
Hún er núna til sölu á Ravelry undir nafninu "Little gnome hat" en ég setti líka link hér til hliðar. Maður þarf víst ekki að vera með aðgang að Ravelry til að nota hann. Mjög sneddí ;)

Facebook síða

Ég bjó til Facebook síðu í gær til að selja prjónavörur og halda utan um örnámskeið sem ég er að prófa mig áfram með.

Undanfarið hef ég verið að kenna konum að prjóna Haruni sjalið og það er búið að vera ógeðslega gaman. Ég ákvað því að stíga skrefinu lengra og prófa að bjóða upp á fleira eins og kvöldkennslu í því hvernig á að gera tvo hluti á einn hringprjón.

Fyrir þær sem hafa áhuga á að kíkja á þetta hjá mér þá er heitir þetta "Prjónavörur og prjónanámskeið" inni á Facebook (ég get af einhverjum ástæðum ekki sett link í þennan póst).

Still Light kjóll

Ég byrjað á þessum kjól í sumar. Var alveg hoppandi kát þegar ég fann uppskriftina, keypti hana strax og byrjaði að spá í garn. Það tók mig heillangan tíma að velja lit og ég gerði ýmsar tilraunir með garn. Ég tímdi nefnilega alls ekki að kaupa Drops Alpaca sem er gefið upp og endaði s.s. á að nota Sisu í þessum fína túrkísbláa lit.

Kjóllinn endaði svo sem svona "in between" verkefni og ég kláraði hann loksins í síðustu viku ... til þess eins að komast að því að hann er of stór, voða sætur en of stór. Þannig að ég er auðvitað byrjuð á öðrum (en ekki hvað?) úr gráu Drops Alpaca sem ég tímdi loksins að splæsa í.

Vettlingaæði

Ég fékk nett vettlingaæði um daginn og gerði fullt af vettlingum bæði á mig og börnin.


Þessa gerði ég úr Abuelita Merino Worsted og Novita litaskiptu garni. Þeir eru æðislega mjúkir. Uppskriftin er aðlöguð úr Fleiri Prjónaperlum.




Sonur minn fékk þessa. Þeir eru úr léttlopa og uppskriftin er úr Vettlingar og fleira. Mér tókst að gera villu í munstrinu á öðrum og það er að gera mig geðveika :P




Þessir eru í karlmannsstærð og úr Álafosslopa. Uppskriftin er sú sama og barnavettlingarnir hér á undan.




Þessir eru úr Álafosslopa og þæfðir í klessu. Uppskriftin er samsuða úr bókinni Vettlingar og fleira.




Hér eru svo Bella's mittens á mig. Myndin gerir þeim reyndar ekkert sérlega góð skil því þeir eru hrikalega mjúkir og djúsí. Garnið er Abuelita silkiblönduð merinoull. Yndislegt alveg.




Að lokum, mynd af herlegheitunum.

Snjókorn

Fyrir jól heklaði ég nokkur snjókorn til að hengja upp í gluggann. Mjög skemmtileg verkefni og aragrúi af fríum uppskriftum til á Ravelry.

Lopakjóll

Þessi kjóll er úr bókinni Strikketøj eftir Helgu Isager. Ég er búin að ætla mér að gera hann alveg heillengi. Byrjaði á honum fyrir u.þ.b. ári síðan nema úr öðru garni en kláraði aldrei. Svo þegar ég frétti að kóngablái plötulopinn væri kominn aftur þá fannst mér tilvalið að gera einn svona kjól úr honum (enda keypti ég rúmlega kíló til að eiga). Ég bætti síðan við bláum glitþræði í berustykkið til að gera kjólinn smá "fansí".

Það gekk samt ekki áfallalaust að prjóna úr einföldum plötulopa. Ekki því ég væri alltaf að slíta heldur því ég var svo hrædd um að prjónlesið héldi ekki. Ég náði samt að jafna mig á endanum og prjónaði mig í gegn um uppskriftina. Þá komst ég að því að með því að fylgja henni og gera útaukningar niður eftir öllum kjólnum þá varð hann allt, allt of víður. Ég rakti því upp nánast upp að berustykki og prjónaði aftur án útaukninga. Hann er enn víður en miklu skárri. Reyndar er ég bara frekar ánægð með hann og nota helling.

Heklaða sjalið mitt

Kláraði þetta fína sjal um daginn og er alveg ofboðslega ánægð með það. Upphaflega langaði mig að gera svart/hvítt sjal en svo þegar ég fann ekki þannig garn sem ég var ánægð með ákvað ég að splæsa í þennan hrikalega fallega lit frá Evilla.
Það fóru tæplega tvær 220g hespur í sjalið og það er hrikalega þykkt og kósý. Hugsa samt að næst myndi ég nota stærri heklunál til að fá betra "drape" í sjalið.
Uppskriftin er af Ravelry og má finna undir Bonita patterns.

Feeling blue ...

Ég er í bláu stuði þessa dagana. Þótt grænn sé alltaf uppáhalds liturinn minn þá fylgir blár fast á eftir. Enda fer blár mér eiginlega betur.
Um daginn frétti ég að kóngablái plötulopinn væri kominn aftur. Ég er búin að bíða og vona svo lengi að ég rauk út í búð og keypti mér kíló. Þegar ég var síðan sest niður og byrjuð að prjóna kjól úr honum fattaði ég að ég var á sama tíma með sjal í gangi úr bláum tónum, blágrænan skokk og nýbúin að kaupa kóngablátt garn í vettlinga og húfu. Sem sagt blátt blátt blátt þessa dagana hjá mér. Kannski er það vetrartíminn.

Lopastrákarnir mínir

Ég byrjaði á peysum handa strákunum mínum í sumar og nennti loksins að klára seinni peysuna núna nýlega. Sem betur fer vildi sá eldri ekki hettu og það flýtti helling fyrir mér.



Uppskriftin er úr lopablaði og heitir Þíða (minnir mig).

Mér finnst voða gaman að prjóna lopapeysur á þá og leika mér með liti. Peysurnar eru s.s. alveg eins nema ég víxla litunum. Gráa peysan er með brúnu munstri og brúna peysan með gráu. Nú er bara spurning um að gera kannski eina hvíta á litla skottið.

Regnbogasjal

Mig hefur svo lengi langað að prjóna úr svona regnbogagarni, ég vissi bara aldrei hvað. Revontuli sjalið liggur einhvernvegin alltaf beinast við en eins og ég hef áður nefnt þá langar mig ekki að gera annað svoleiðis strax.
Svo sá ég mynd á Ravelry af Gail (a.k.a Nightsongs) úr Kauni regnbogagarni og það var alveg hrikalega flott. Ég reyndar vildi frekar nota Evilla Artyarn en það er sami framleiðandi og varla það mikill munur.

Svo byrjaði ég að prjóna ....

Ég er svo mikill fanatíkus að ég gat ekki sætt mig við það hvernig litaskiptin komu út þannig að ég rakti upp aftur og aftur og aftur og aftur! Allur Gamlársdagur og megnið af Nýársdegi fóru í að prjóna þetta sjal aftur og aftur þar til ég var ánægð með litaskiptin. En ég er líka verulega ánægð með útkomuna og á nóg af garni eftir :)